Xocalı faciəsi 1992-ci il xarici mediasının gözü ilə: həqiqətlər və dəyişməyən nəticə
Beynəxalq hüquqün bütün norma və prinsiplərinə uygun olaraq Xocalıda 27 il əvvəl ermənilər tərəfindən
törədilmiş qanlı hadisə soyqırım aktı kimi təfsir olunmalıdır. Beynəlxalq təşkilatlar ikili
standartlara yol vermədən bu dəhşətli hadisəni genosid aktı kimi tanımalı,
cinayət törədənlərə qarşı nəhayət ki, sanksiyalar tətbiq etməlidirlər.
Soyqırımı cinayətinin hüquqi məzmunu BMT Baş
Məclisinin 9 dekabr 1948-ci il tarixli 260 nömrəli qətnaməsi ilə qəbul edilmiş
«Soyqırımı cinayətinin qarşısının alınması və cəzalandırılması haqqında
Konvensiya» ilə müəyyən edilib. Xocalı soyqırımı xarakter etibarilə beynəlxalq
cinayət kateqoriyasına aiddir. Bu kateqoriyadan olan cinayətlərin əsas
tərkibləri ikinci dünya müharibəsindən sonra yaradılmış beynəlxalq hərbi
tribunalların (Nürnberq, Tokio) Nizamnaməsində ifadə olunmuş, sonradan həmin
cinayət tərkibləri Yuqoslaviya və Ruanda beynəlxalq cinayət tribunallarının
nizamnamələrində, habelə Beynəlxalq Cinayət Məhkəməsinin Statusunda
təkmilləşdirilməklə bir daha təsdiqini tapıb.
Prezident İlham Əliyevin tapşırıq və
tövsiyələri əsasında Xocalı faciəsinin dünya ölkələrində tanıdılması, erməni
qəsbkarlarının ifşası istiqamətində sistemli iş aparılır. Hər il Prezident
Administrasiyası tərəfindən tədbirlər proqramı təsdiqlənir və icra edilir. Bu
baxımdan Heydər Əliyev Fondunun xidmətlərini xüsusi qeyd etmək lazım gəlir.
Fond bəşəriyyətin ən böyük faciələrindən olan Xocalı soyqrımı haqda faktların
dünyaya çatdırılması istiqamətində sistemli və ardıcıl fəaliyyət göstərir.
2018-ci il fevralın 26-da Azərbaycan Prezidenti İlham Əliyev
“Rossiya-24” telekanalının müxbirinə müsahibəsində bildirib: “Bu gün Azərbaycan xalqının tarixində ən
qanlı səhifələrdən biridir, azərbaycanlıların soyqırımı günüdür. Bu günü
Azərbaycan xalqı həmişə yadda saxlayacaq və heç vaxt unutmayacaq. Ermənistan 26
il əvvəl azərbaycanlılara qarşı soyqırımı törədib. Bunun nəticəsində 613 dinc
sakin öldürülüb, onlardan 106-sı qadın, 63-ü uşaqdır. 1200-dən çox dinc sakin
əsir düşüb və işgəncələrə məruz qalıb, 500-ə qədər insan əlil olub, 150 dinc
sakin barədə isə heç bir məlumat yoxdur. Onlar itkin düşmüş sayılırlar, amma
onların öldürüldüyü ehtimalı daha çoxdur. Həmin müdhiş gün, həmin qanlı faciə
barədə çox sayda video, foto materiallar, möcüzə nəticəsində sağ qalmış
insanların şahidliyi var. Bu, erməni faşizminin təzahürü idi. Bu, vəhşiliyin
təzahürü idi”.
Canlı şahid
ifadələri, foto və videomateriallar da Xocalıda baş verən qanlı hadisələrin
soyqırımı olduğunu tam təsdiqləyir. Nəzərə alaq ki, ermənilər qondarma “erməni
soyqırımı” barədə uydurma məlumatları 100 ildən artıqdır ki, heç bir fakta
söykənmədən dünyaya yayırlar. Dünyanın gözü qarşısında baş verən bir faciə
barədə isə həqiqətlərə göz yumulur, yenə də hansısa xristian təəssübkeşliyi,
ikili, üçlü yanaşma özünü göstərir. Bu gün təkrar sadalayacagım faktlar həmin dövrün
qanlı hadisələrinin dəhşət saçan mənzərəsini əks etdirir. Cənabi faktlardan
qaçmaq isə mümkün deyil. Fikir verin:
Zori Balayan 1996-cı ildə dərc olunmuş
«Ruhumuzun canlanması» adlı kitabında (260-262-ci səh.) Xocalıda baş verən
soyqırım barədə qeyd edir: «Biz Xaçaturla ələ keçirdiyimiz evə girərkən
əsgərlərimiz 13 yaşlı bir türk uşağını pəncərəyə mismarlamışdılar. Türk uşağı
çox səs-küy salmasın deyə, Xaçatur uşağın anasının kəsilmiş döşünü onun ağzına
soxdu. Daha sonra bu uşağın başından, sinəsindən və qarnından dərisini soydum.
Saata baxdım türk uşağı 7 dəqiqə sonra qan itirərək dünyasını dəyişdi. Ruhum
xalqımın bir faizinin belə qisasını aldığı üçün sevincindən qürurlanırdı.
Xaçatur daha sonra ölmüş türk uşağının cəsədini hissə-hissə doğradı və bu şeyi
daha 3 türk uşağına etdik. Mən bir erməni vətənsevər kimi öz vəzifəmi yerinə
yetirdim».
Faciə baş
verən gün Xankəndində ezamiyyətdə olmuş Fransanın «Libardion» qəzetinin əməkdaşı
Jul Gen Vaynerin qeydləri xüsusi maraq doğurur. Xocalı soyqırımını
qorxulu yuxuya bənzədən Vayner jurnalistika ilə məşğul olduğu 25 il ərzində müharibələrin
getdiyi çoxlu müxtəlif ölkələrdə olduğunu, lakin Xocalı şəhərindəki kimi dəhşətli
və tükürpədici mənzərələrlə rastlaşmadığını yazmışdır.
Jurnalist «Libardion» qəzetində çap etdirdiyi
«Erməni terroriziminin canlı şahidi oldum» sərlövhəli yazıda Xocalıda
baş verənlərin qabaqcadan cızılan ssenari olduğunu açıq bəyan etmişdir. Onun fikrincə,
bunda məqsəd bütövlükdə bəşəriyyətin gözünü qorxutmaq olmuş, erməni terrorizimi
dünyanı məhz bu yolla «ram etməyə» çalışmışdır. Fransalı müxbir Xocalı qətliamında
iştirak edən erməni terror dəstələrinin necə amansızlıq etdiklərinin canlı şahildi
olduğunu yazmışdır. Sovet ordusunun 366-cı motoatıcı alayının ermənilərlə birgə
Xocalı üzərinə hücumundan bir gün əvvəl Xankəndində bu alayın qərargahında olan
Vayner orada rus polkovniki Zaviqarovun əməliyyata ciddi hazırlaşdığının şahidi
olduğunu göstərmişdir. «Hələ Xocalı işğal edilməmişdən bir gün əvvəl 49 azərbaycanlı
əsir alınaraq kütləvi şəkildə güllələndi. Batalyon və hərbi hissələrin komandirləri
dinc əhalinin məhvinə qərar vermişdilər. Hücumdan bir neçə saat əvvəl
366-cı alayın qərargahında 58 azərbaycanlı qətlə yetirildi. Onların çoxu qadın və
uşaqlar idi. Cəsədlərin gömüldüyü quyuların yanından keçmək mümkün deyildi. Çünki
oradan dəhşətli dərəcədə meyit iyi gəlir, itlərin, çaqqalların səsləri eşidilirdi»
- deyə müşahidələrini obyektiv şəkildə qeydə almış fransalı jurnalist Xocalıya hücum
ərəfəsində Ermənistanın hakimiyyət orqanları rəhbərlərinin 366-cı motoatıcı alayın
qərargahında olduğunu da vurğulamışdır.
“The Washington
Post” qəzeti (ABŞ), 28 Fevral 1992-ci il: “Qaçqınlar bildirirlər ki, yüzlərlə insan
erməni hücumu zamanı həlak olub. Bu gün 7 meyit tapılıb, onların ikisi uşaq və üçü
qadın idi, biri yaxın məsafədən sinəsindən güllələnmişdi. Digər 120 qaçqın Ağdam
xəstəxanasında ağır yaralarla müalicə olunur”.
“The İndependent” (London), 29 fevral 1992-ci il:
“Helen Uomak - “Röytersin Ağdamdakı müxbiri Elif Kaban bildirir ki, mülki əhalinin
kütləvi qırğınından sonra azərbaycanlılar Xocalı şəhərinə ermənilərin hücumu zamanı
həlak olmuş insanları dəfn edirdilər. “Dünya burada baş verənlərə göz yumur. Biz
ölürük, siz isə sadəcə izləyirsiniz, – deyə adamlardan biri bir qrup jurnalistə
qışqırıb”.
“The Sunday Times” qəzeti
(London), 1 Mart 1992-ci il: “Tomas Qolts: Sağ qalan azərbaycanlılar danışırlar
ki, erməni əsgərləri 450-dən çox azərbaycanlını güllələyib, süngüdən keçiriblər.
Onların əksəriyyəti qadın və uşaqlar olub, Yüzlərlə, bəlkə də minlərlə insan itkin
düşüb və ya həlak olub. Dünən axşam Ağdamın meyitxanasında 579 ölü qeydə alındı.
29 meyit qəbiristanlıqda basdırılmışdı. Dəfn mərasimi gözlənilən yeddi meyitin ikisinin
uşaq, üçünün isə qadın olduğunu gördüm. Onlardan biri yaxın məsafədən sinəsindən
güllə yarası almışdı. Ağdam xəstəxanasında dəhşətli mənzərə yaranmışdı. Həkimlər
qırğından qaçan 140 xəstənin əksəriyyətinin güllə yarası aldığını bildirirdilər...”
“The Washington Times” qəzeti
(ABŞ), 2 Mart 1992-ci il: “Erməni hücumu zamanı yüzlərlə azərbaycanlı öldürüldü
və ya itkin düşdü. Təxminən 1000 Xocalı sakini çərşənbə axşamı erməni ordusu tərəfindən
qətlə yetirildi. Azərbaycan televiziyası Xocalı ərazisindən gətirilən meyitlərlə
dolu yük maşınlarını göstərdi”.
“The Times” qəzeti (London),
2 Mart 1992-ci il: “Anatoli Liven: Biz qarla örtülmüş Dağlıq Qarabağ təpəliklərinə
endikcə, cəsədlərin hər tərəfə yayıldığını gördük. Açıq-aydın görünürdü ki, insanlar
xilas olmaq üçün qaçarkən güllələnmişlər...”.
“Channel 4 News” televiziyası
(Böyük Britaniya), 2 Mart 1992-ci il: “2 fransız jurnalisti mülki geyimdə olan
32 qadın, kişi və uşaq meyiti görüb. Onların əksəriyyəti 1 metrdən də yaxın məsafədən
başlarından güllələnib”.
“The Times” qəzeti (London),
3 Mart 1992-ci il: “Anatoli Liven: Dağlıq Qarabağın təpəliklərinə səpələnmiş qadın
və uşaqlardan ibarət 60-dan çox meyit erməni qoşunlarının dinc azərbaycanlı əhalisinin
qətlə yetirdiyi barədə bəyanatları təsdiqləyir. Yüzlərlə insan itkin düşüb. Təpəliklər
və kiçik vadi boyu qurumuş otların üzərinə səpələnmiş Azərbaycan qaçqınlarının cəsədləri
ötən çərşənbə erməni hərbçilərinin törətdikləri qırğından xəbər verir...”.
“Nie” qəzeti, (Bolqarıstan),
Violetta Parvanova: “Xocalı insanlığın faciəsidir”.
“BBC Morning News” 3 Mart
1992-ci il, saat 07.37 yayımında vəziyyəti belə əks etdirmişdir: “Hadisə yerində
olan müxbirimiz 100-dən çox azərbaycanlı kişi, qadın və uşaq cəsədlərini gördüyünü
və bunların başlarına yaxın məsafədən atəş açılaraq öldürüldüyünü xəbər verir”.
“İzvestiya” (Moskva), 4 mart 1992-ci il: “Videokamera
qulaqları kəsilmiş uşaqları göstərdi. Bir qadının sifətinin yarısı kəsilmişdir.
Kişilərin skalpları götürülmüşdür”. “Financial Times” qəzeti (London), 14 mart
1992-ci il: “General Polyakov bildirmişdir ki, 366-cı alayın 103 nəfər erməni hərbçisi
Dağlıq Qarabağda qalmışdır”.
“The Times” qəzeti (London),
4 mart 1992-ci il: “Çoxları eybəcər hala salınmışdır, körpə qızın ancaq başı qalmışdı”.
“The Age, Melbourne” qəzeti
(Avstraliya), 6 Mart 1992-ci il: “Helen Vomak: Qurbanların dəqiq sayı bəlli deyil,
lakin şübhə edilmir ki, ötən həftə Dağlıq Qarabağın qarlı dağlarında Azərbaycanın
Xocalı kəndinin mülki əhalisi erməni ordusu tərəfindən qətlə yetirilib. Ağdam şəhərində
sığınacaq tapmış Xocalı qaçqınları ermənilərin 25 fevralda onların evlərinə necə
hücum etdiklərini və meşələrə qaçaraq gizlənənləri izləyib öldürdüklərini ətraflı
danışırlar. Ağdama çərşənbə axşamı çatanda təzə qazılmış 75 qəbir və eybəcər hala
salınmış dörd cəsədi məsciddə gördük...”.
“The Sunday Times” qəzeti (London), 8 Mart 1992-ci il:
“Tomas Qolts: Ötən həftə bu yer xəritədən silindi. Dəhşətli xəbərlər Azərbaycanın
sərhəd şəhəri Ağdama gəlir, meyitxanalar meyitlərlə dolurdu… Mən Qarabağa baş çəkən
sonuncu qərb adamı idim. Yanvar ayı idi və insanlar uğursuz talelərini əvvəlcədən
görürdülər. Azərbaycanlı müdafiəçilər bir-bir həlak olurdular. Sağ qalanlar bildirirdilər
ki, erməni qüvvələri bundan sonra amansız qırğına başladılar, tərpənən hər şeyə
atəş açırdılar. Bəziləri qəzəblərini xaricilərə bildirirdilər: “Hanı mənim qızım,
hanı mənim oğlum?”, – deyə analar ah-nalə edirdilər. Zorlanmışdır. Doğranmışdır.
İtkin düşmüşdür”.
“Le Mond” qəzeti (Paris), 14 mart 1992-ci il: “Ağdamda
olan xarici jurnalistlər Xocalıda öldürülmüş qadın və uşaqlar arasında skalpları
götürülmüş, dırnaqları çıxarılmış 3 nəfəri görmüşlər. Bu, azərbaycanlıların təbliğatı
deyil, bu, reallıqdır”. “İzvestiya” (Moskva), 13 mart 1992-ci il: “Mayor Leonid
Kravets: Mən şəxsən təpədə yüzə yaxın meyit gördüm. Bir oğlanın başı yox idi. Hər
tərəfdə xüsusi qəddarlıqla öldürülmüş qadın, uşaq, qocalar görünürdü”.
R.Patrik, İngiltərənin “Fant men nyus” teleşirkətinin jurnalisti
(hadisə yerində olmuşdur): “Xocalıdakı vəhşiliklərə dünya ictimaiyyətinin gözündə
heç nə ilə haqq qazandırmaq olmaz”. Livanlı kinooperator təsdiq etmişdir ki, onun
ölkəsinin varlı daşnak icması Qarabağa silah və adam göndərir.
Rusiyanın “Memorial” hüquq-müdafiə mərkəzinin məlumatına
görə, dörd gün ərzində Ağdama Xocalıda qətlə yetirilmiş 200 azərbaycanlının meyiti
gətirilmiş, onlarca meyitin təhqirə məruz qalması faktı aşkar edilmişdir. Ağdamda
181 meyit (130 kişi və 51 qadın, o cümlədən 13 uşaq) məhkəmə-tibbi ekspertizasından
keçirilmişdir. Ekspertiza zamanı müəyyən edilmişdir ki, 151 nəfərin ölümünə güllə
yaraları, 20 nəfərin ölümünə qəlpə yaraları səbəb olmuş, 10 nəfər küt alətlə vurularaq
öldürülmüşdür. Hüquq-müdafiə mərkəzi diri adamın baş dərisinin soyulması faktını
da qeydə almışdır.
“Newsweek” jurnalı (ABŞ), 16 Mart 1992-ci il: “Ötən həftə
Azərbaycan yenidən məzarlığa çevrilmişdir: qaçqınlar və kəsilmiş cəsədlər məscidin
arxasında meyitxana kimi uzanırdı. Bunlar erməni hərbi birləşmələri tərəfindən
25-26 fevralda ələ keçirilmiş Dağlıq Qarabağın kiçik Xocalı yaşayış məntəqəsinin
sadə azərbaycanlı kişiləri, qadınları və uşaqları idi. Bir coxları qaçmağa çalışarkən
yaxından atılan güllə ilə öldürülmüş, bəzilərinin üzləri qəddarcasına əzilmiş, digərlərinin
isə skalpı çıxarılmışdır. Şəhidlərin ailələri göz yaşı axıdırlar”.
“Reuters” agentliyinin fotoqrafı Frederix Lenqeyn: “Birinci
maşında mən 35 meyit saydım, ikincidə isə, meyitlərin sayı bundan çox idi. Bəzilərinin
başları kəsilmiş, çoxları isə yanmışdı …”
“Boston Sunday Globe” qəzeti (ABŞ), 21yanvar 1993-cü il:
Globe əməkdaşı Con Auerbax: “Palçıqlı qaçqın düşərgəsindəki qorxmuş uşaqlar, nalə
çəkən analarla dolu yük maşınları, qorxudan sifəti ağarmış insan dənizi, minlərlə
azərbaycanlı sual yaradır: nə üçün onlar burada sığınacaq axtarırlar. Gördüklərimiz
- onların yolu üstündəki hər bir kəndin sistematik olaraq dağıdılmasının nəticəsidir.
Bu bizim gördüyümüz ən nifrət doğuran hadisədir…”.
Xocalı faciəsinin şahidi olan və sonra Livanın paytaxtı
Beyrutda məskunlaşan erməni jurnalist Daud Kheyriyan, “For the Sake of Cross” (Xaçın
xatirinə) adlı kitabında (səhifə: 62-63) yazır: “...ölülərin yandırılması ilə məşğul
olan bir dəstə erməni martın 2-də Xocalının 1 kilometr qərbində yerləşən bir əraziyə
100 azərbaycanlının meyitini gətirib yığdı. Axırıncı yük maşınında gətirilən ölülərin
içərisində 10 yaşlı bir qız uşağı gördüm. Başından və əlindən yaralanmışdı. Sifəti
göyərmişdi. Soyuğa, aclığa və yaralanmasına baxmayaraq, hələ də yaşayırdı. Çox çətin
nəfəs ala bilirdi. Gözlərini ölüm qorxusu sarmışdı. Həmin vaxt Tiqranyan adlı bir
əsgər qızı tutub cəsədlərin üzərinə atdı. Sonra bütün cəsədləri yandırdılar. Mənə
elə gəldi ki, yanan cəsədlərin içərisində bir nəfər bağırır. Heç nə edə bilmədim”.
Xocalı
faciəsi ilə baglı faktların əks olundugu nəşrlərin aid oldugu ölkələrə diqqət
yetirin. Fransa, ABŞ, Böyük Britaniya, Rusiya və digər ölkələr. Sonradan bu
dövlətlərdən ATƏT-in Minsk qrupunun
üzvləri formalaşdı, məsələnin sülh yolu ilə həll edilməsi missiyasını
çiyinlərinə götürdülər. Nəticə isə hələ də yoxdur. Həmin nəşrlərdəki faktlardan
biri kifayət edir ki, kütləvi insan qırgınına görə Ermənistan işgalçı dövlət
kimi tşrətdiyi cinayətə görə aidiyyatı qurmlar qarşısında cavab versin. Təəssüf
ki, cinayətkar dövlətə qarşı beynəlxalq hüquq müstəvisində hələ ki konkret
addım atılmır. Bütün bunlara baxmayaraq
Xocalı faciəsinin dünyada tanıdılması
istiqamətində hər il dövlət səviyyəsində tədbirlər həyata keçirilir. Əlbəttə,
bu istiqamətdə indiyədək görülmüş işlər daha da genişləndirilməli, kütləvi
informasiya vasitələri, qeyri-hökumət təşkilatları tərəfindən bu işə ciddi dəstək verməlidirlər.
Bunun üçün virtual məkanın - internetin hüdudsuz imkanlarından geniş istifadə
olunmalı, eyni zamanda səfirliklər, diaspor təşkilatları birgə işləməli, faciə
ilə bağlı həqiqətlərin yerləşdikləri ölkələrin ictimaiyyətinə çatdırılması üçün
fəallıq göstərməlidirlər.
Комментарии
Отправить комментарий