Prezident Azərbaycan gənclərinə önəmli mesajlar verdi

Gənclər Gününə həsr olunmuş respublika toplantısında Prezident İlham Əliyev gənclərin ölkəmizin ictimai-siyasi həyatındakı fəal rolundan, onlara göstərilən dövlət qaygısından bəhs edərək bu siyasətin qarşıdakı illərdə də ugurla davam etdiriləcəyini bildirdi. Dövlət başçısı gənclərin peşəkar olmasını, milli və vətənpərvərlik ruhunda tərbiyə almalarını və ölkəyə layiqli vətəndaş kimi yetişmələrinin zəruriliyini önə çəkdi. Dövlət başçısının çıxışı bir daha təsdiq etdi ki, Azərbaycanda gənclər siyasəti dövlət siyasətinin mühüm tərkib hissəsidir.

 Azərbaycan gəncliyi ictimai həyatın bütün bölmələrində aktiv fəaliyyəti ilə seçilir, siyasi, iqtisadi, humanitar, sosial tədbirlərin həyata keçirilməsində mühüm rol oynayırlar. Ölkəmizdə gənclər siyasətinin yeni mərhələsi başlanıb ki, bu da dövlətin həyata keçirdiyi düşünülmüş, ardıcıl ictimai-sosial islahatlardan əhalinin bütün təbəqələri kimi gənclərin də hərtərəfli yararlanmasına  şərait yaradacaq.  Gənclərin cəmiyyətin inkişafında və öz problemlərinin həllində rolunu artırmaq, ölkənin gələcək inkişafında iştirakını və məsuliyyətini yüksəltmək, paytaxt və regionlarda yaşayan gənclərin fikir mübadiləsinə şərait yaratmaq, gənclər və dövlət qurumları, hökumət nümayəndələri ilə açıq ünsiyyəti asanlaşdırmaq məqsədilə ulu öndər Heydər Əliyev tərəfindən hələ 1995-ci ildə Azərbaycan Gənclərinin Forumunun keçirilməsi təşşəbbüsü irəli sürülmüşdü. 1996-cı il fevralın 2-də müstəqil Azərbaycan Respublikası gənclərinin I forumu keçirildi. Gənclərin həyatında çox önəmli və yaddaqalan bir hadisəyə çevrilən forumdan sonra ölkədə gənclərə yeni münasibət açıq-aydın hiss olundu. Hər il fevral ayının 2-sinin Azərbaycanda Gənclər Günü kimi qeyd olunması barədə sərəncam imzalayan böyük öndər bəyan etmişdi ki, “biz dövlətin və cəmiyyətin idarə edilməsində gənc nəslin qüvvəsinə arxalanacaq, onların imkanlarından maksimum istifadə edəcəyik”. Bu fikir ölkə gəncləri qarşısında geniş imkanlar açdı və gənclər mühüm dövlət və hakimiyyət orqanlarında məsul vəzifələrə irəli çəkildilər.

Yüksək intellekti və bacarığı ilə seçilən gənclərin dövlət idarəetmə işlərinə cəlb olunmasi deyilənləri bir daha təsdiqləyir. Prezident İlham Əliyev də son 15 ildə gənc kadrların dövlət idarəçiliyində yüksək vəzifələrə gətirilməsi istiqamətində konkret addımlar atır. Buna bariz nümunə kimi son illərdə Energetika, Təhsil, Kənd Təsərrüfatı, Əmək və Əhalinin Sosial müdafiəsi nazirlikləri, “ASAN Xidmət” Mərkəzi və digər nazirlik və qurumlarda gənclərin ən yüksək postlara təyin edilməsini göstərmək olar. Gənc kadrlar dövlət işi ilə yanaşı qanunverici orqanda da üstünlük təşkil edirlər. Bu kateqoriyadan olan insanların irəli çəkilməsi təkcə mərkəzlə məhdudlaşmır,  proses regionlarda da həyata keçirilir. 

Gənclərin rəhbər vəzifələrdə irəli çəkilməsinin pozitiv tərəfləri xüsusi qeyd olunmalıdır. Əvvəla böyük potensial sahib olan gənclər daha əzmlə çalışmaga və göstərilən etimadı əməli işləri ilə dogrultmaga çox meyilli olurlar. Digər tərəfdən gənclər mütəmadi olaraq yeniliklərə can atır, idarəçilikdə yeni yanaşmalara üstünlük veririlər. Müasir informasiya-texnologiya əsrinin tələblərinə yaşlı nəsillə müqayisədə daha tez uyğunlaşan gənclik onun tətbiqinə də maksimum nail olurlar.  Bu anlamda gəncliyin enerjisinin idarəçilik sistemində tətbiqi daha çox səmərə verir.  Məhz bu baxımdan gənc kadrlara dövlət rəhbərliyinin göstərdiyi etimad mühüm əhəmiyyət kəsb edir.  Son dövrlərin təcrübəsi də sübut edir ki,  gənc kadrların rəhbərlik etdiyi və ya rəhbərliyində təmsil olunduğu qurumlarda innovativlik və məhsuldarlıq daha yüksək olur.

Prezident İlham Əliyev ölkədə gənclər siyasətinin uğurla davam etdirərək müvafiq sərəncamı ilə 2007-ci il “Gənclər ili” elan etdi. Azərbaycanda gənclərin hərtərəfli inkişafı istiqamətində genişmiqyaslı işlər aparılır. Azərbaycanda Gənclər Fondunun, Prezidentin Gənclər mükafatının təsis edilməsi də bu kateqoriyadan olan vətəndaşlara göstərilən xüsusi diqqəti əks etdirir. Azərbaycan gəncliyinin potensialını müasir dövrün tələblərinə uyğunlaşdırmaq üçün güclü hüquqi baza yaradılıb. Ötən müdətdə qəbul edilən dövlət proqramlarına diqqət yetirək.

- “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”;

-  “Azərbaycan gəncliyi 2011-2015-ci illərdə” Dövlət Proqramı;

-  “2015-2025-ci illərdə Azərbaycan gənclərinin İnkişaf Strategiyası”;

- “Azərbaycan gəncliyi 2017–2021-ci illərdə” Dövlət Proqramı;

Bu Dövlət Proqramların qəbulunda məqsəd Azərbaycanda gənclər siyasətinin daha səmərəli həyata keçirilməsinə nail olmaq, cəmiyyətin bütün sahələrində gənclərin fəal iştirakına şərait yaratmaq, onların yaradıcı və innovativ potensialının üzə çıxarılmasını dəstəkləməkdir. Məqsəd, həmçinin gənc nəslin sağlamlığını qorumaq, gənclərin təhsil və məşğulluq məsələlərinə diqqəti artırmaq, müasir informasiya-kommunikasiya texnologiyalarından səmərəli istifadə etmək, ölkədə könüllülük hərəkatını inkişaf etdirməkdir.

Gənclərin intellektual yüksəlişinə sərmayə qoyulması, onların fərdi keyfiyyət və qabiliyyətlərinin inkişafı, nanotexnologiyaları dərindən mənimsəmiş yeni menecerlər sinfinin yaradılması, intellektin milli inkişafda prioritet amili kimi müəyyənləşdirilməsi hazırda qarşıda dayanan əsas vəzifələrdən biridir. Cənab İlham Əliyev də çıxışlarında daim vurğulayır ki, iqtisadi resursların insan kapitalının inkişafına yönəldilməsi yolu ilə formalaşan yeni təfəkkürlü intellektual elita ölkənin perspektiv inkişafının əsas lokomotivi – aparıcı qüvvəsi kimi çıxış edəcəkdir. Məhz bu hədəfin reallaşdırılması məqsədilə son illərdə görülən işlər öz müsbət nticələrini verib.

Prezident İlham Əliyev Azərbaycan gənclərinin fəaliyyətini daim yüksək qiymətləndirib və gənclərlə baglı keçirdiyi son toplantıda da konkret tövsiyələrini verib. Ölkə başçısı gənclərimizin milli maraqlarımızı hər şeydən üstün tutmalarını və dövlət müstəqilliyinin möhkəmlədirilməsində üzərlərinə düşən vəzifələri layiqncə yerinə yetirməyə çagırıb: “Hər bir gənc bilməlidir ki, bizim hamımızın əsas vəzifəsi dövlət müstəqilliyini möhkəmləndirməkdir, onu qorumaqdır. Biz xoşbəxtik ki, müstəqillik dövründə yaşayırıq. Əsrlər boyu Azərbaycan xalqı müstəqillik eşqi ilə yaşamışdır. Nəsillər gəlirdi-gedirdi, biz başqa ölkələrin tərkibində yaşayırdıq, öz bayrağımızı qaldıra, öz himnimizi səsləndirə bilmirdik. Amma bu gün böyük xoşbəxtlikdir ki, biz müstəqillik dövründə yaşayırıq və əsl müstəqil siyasət həyata keçiririk. Ona görə bizim gənclərimiz həmişə yadda saxlamalıdırlar ki, Azərbaycanın dövlət müstəqilliyi hər şeydən üstündür, Azərbaycan xalqının maraqları hər şeydən üstün olmalıdır. Bir daha demək istəyirəm ki, müstəqilliyi qorumaq üçün mütləq bilik, savad, vətənpərvərlik və milli təfəkkür olmalıdır”.

Son illər həyata keçirilən tədbirlər gənclərin hərtərəfli inkişafının təmin olunması üçün siyasi, sosial-iqtisadi, təşkilati - hüquqi şərait və təminatların yaradılmasını sürətləndirmiş, onların ictimai-siyasi fəallığının artmasına kömək etmişdir. Bakıda Gənclər Mərkəzinin, regionlarda isə “Gənclər Evi”nin inşa edilməsi çox mühüm addım oldu. Ölkəmizdə fəaliyyət göstərən gənclər təşkilatlarının əhatə etdikləri məsələlər kifayət qədər genişdir: gənclərin vətənpərvər ruhda tərbiyəsi, məlumatlandırılması, işsizliyin azaldılması, gənclərin sağlamlığı, təhsili, fəal vətəndaş mövqeyi, mədəniyyətin geniş kütlələr arasında təbliği və s. məsələlər kifayət qədər aktualdır. Azərbaycanda 300-dən çox gənclər təşkilatı fəaliyyət göstərir ki, onlar 30-dan çox beynəlxalq platformada təmsil olunublar. 

Azərbaycan gəncliyi öhdəsinə düşən vəzifələri həmişə layiqincə yerinə yetirib, ölkədə gedən proseslərin önündə olub. 90-cı illərin əvvələrində milli azdlıq ugrunda mübarizədə sovet irticaçı rejiminin tanklarının qarşısına əli yalın çıxan da, Qarabag savaşında işgalçı ermənilərə qarşı sinələrini sipər edən də Azərbaycan gənci idi. 2016-cı ilin aprelin əvvəllərində də müzəffər Azərbaycan ordusunun gənc zabit və əsgərləri  düşmən təxribatının qarşısını alaraq əks hücumla 2 min hektar ərazini işğaldan azad etdi. Dördgünlük müharibədə düşmənə sarsıdıcı zərbə vuran və xalqımıza qələbə dadızdıran Azərbaycan ordusu şəhidlər də verdi. Gənclər Gününə həsr olunan toplantıda “Haqlı olaraq gənclərimizlə fəxr edə bilərik”, - deyən dövlətimizin başçısı şəhidlərimizin böyük əksəriyyətinin gənclər olduğunu vurğuladı və qeyd etdi ki, hər bir gəncin əsas vəzifəsi müstəqilliyimizi möhkəmləndirmək olmalıdır.

Azərbaycan gəncləri dövlət başçısının son toplantıda yeni mərhələ üçün ən müxtəlif istiqamətlər üzrə onlara ünvanladıgı mesajları dərin təhlil etməli və öz fəaliyyətlərini buna uygun qurmalıdırlar. Çünki Azərbaycanın gələcəyin bugünkü gəncliyin bilikli, savadlı, peçəkar olmasından çox asılıdır.