Ermənistanda ixtisar olunan işçilər etirazlara qalxıblar

   Ermənistanın Milli Ruh Sağlamlığı Mərkəzində ("Nubaraşen" psixi klinikası) tibb və texniki personalın kütləvi şəkildə  ixtisar olunması ciddi narazılıga səbəb olub.

    Xəstəxana işçiləri NEWS.am müsahibələrində bildiriblər  ki, ötən ilin dekabrın 21-də təkcə bir şöbədən 26 nəfər ixtisar olundu. Onların digər xəstəxanalarda işlə təmin ediləcəyi bildirilsə də nəticə olmadı, əksinə proses daha da  kütləviləşdi. "Biz hamımız ailələrə sahibik və işimizi itiririk. Bu isə heç kimin vecinə deyil”-deyə xəstəxana işçiləri bildiriblər.

   

“Bu xəstəxana  yaşlı və zehni problemlər üzündən özlərinə qayğı göstərə bilməyən xəstələrin müalicəsi üçün olan bir xəstəxanadır. Biz onlara qulluq göstərirdik, bezlərini dəyişdirirdik. Bu çox çətin bir işdir. Küçədə qalmamaq üçün şöbə əməkdaşları bir ay müddətinə əmək haqqından imtina etməyə, xəstəxana binasını kosmetik təmir etməyə hazır olduqlarını bildirdilər. Ancaq rəhbərlik bu fikri rədd edib”-deyə tibb işçisi Arsen Manuçaryan bildirib.

  

   Xəstəxana işçiləri Səhiyyə Nazirinin müavini Arsen Davtyanla görüşdüklərini bildiriblər. O, məsələdən nazirin xəbərinin oldugunu və ixtisarla baglı müvafiq əmrini  xatırladaraq, heç bir köməklik edə bilməyəcəyinə təəssüf edib.

    “Bundan sonrakı nə olacaq - biz bilmirik. Bu, ciddi problemdir, çünki tezliklə ailəmizi qidalandırmaq mümkün olmayacaq "-deyə ixtisara düşən işçilər bildiriblər.