Ermənistanda əsgər və zabitlər etirazlara qalxıb

Ermənistan ordusunda xidmət etmiş zabit və əsgərlər Nikol Paşinyan hakimiyyətinə qarşı etirazlara qalxıblar. Xüsusilə dördgünlük aprel döyüşlərində iştirak etmiş və yaralanmış hərbçilər agır sosial şəraitdən narazılıqlarını bidirirlər. Madagiz yaşayış məntəqəsindəki 33651 nömrəli hərbi hissədə qulluq etmiş və aprelin 4-də Talış yaşayış məntəqəsində yaralanmış erməni hərbi qulluqçu Edik Martirosyan mövcud Paşinyan hakimiyyəti tərəfindən ona heç bir diqqət göstərilmədiyini deyib. Edik Martirosyan həyat yoldaşı Leyla Kirakosyanla Yeğeqnadzor şəhərində kirayə yaşayır və səhhətində problem olmasına baxmayaraq hərbi hissədə işləyir.

Aravot.am saytına müsahibə verən hərbi qulluqçu bir sıra problemləri olsa da, bu illər ərzində ona heç kim heç bir köməklik göstərilmədiyini bildirib. Paşinyan hökuməti tərəfindən heç bir məsələdə ona yardım edilmədyini bildirən Martirosyan, qeydiyyatda olduğu rayon rəhbərliyindən də heç bir köməklik almadığını qeyd edib. Yeni ailə quran aprel döyüşləri iştirakçısının sosial-məişət şəraitinin olduqca ağır olduğu qeyd edilir. O, adına bir çox kreditlər olduğunu və ödənişli təhsil aldığını vurğulayıb. O, bir az daha rahat iş tapması üçün dövlət qurumlarına dəfələrlə müraciət etdiyini, lakin heç bir köməklik göstərilmədiyini qeyd edib. Matirosyan yaxın vaxtlarda aprel döyüşlərində iştirak edən yoldaşları ilə birlikdə aksiyalar keçirəcəklərini bildirib.

Xatırladaq ki, 2016-cı il aprelin 1-dən 2-nə keçən gecədən başlayaraq Ermənistan Silahlı Qüvvələri təxribatçı hərəkətlər edərək yaşayış məntəqələrimizi atəşə tutmuşdular.  Tarixə dördgünlük müharibə kimi düşmüş aprel döyüşləri 1994-cü ildə atəşkəs haqqında saziş imzalandıqdan bəri ən şiddətli döyüşlər idi.  Müzəffər Azərbaycan Ordusu düşmən təxribatının qarşısını alaraq əks-hücumla 2 min hektar ərazini işğaldan azad etməsi beynəlxalq birlik tərəfindən təbii qəbul olundu. Ən qısa zamanda düşmən təxribatının qarşısının qətiyyətlə alınması və Silahlı Qüvvələrimizin sürətlə irəliləməsi Ermənistan başda olmaqla onun himayədarlarını da təşvişə saldı. Döyüşlər Azərbaycan Silahlı Qüvvələrinin qələbəsi ilə nəticələnmiş, Tərtər rayonunun Talış kəndi ətrafındakı yüksəkliklər və Seysulan kəndi, Cəbrayıl rayonunun Lələ təpə yüksəkliyi və Cocuq Mərcanlı, Goranboy rayonunun Gülüstan kəndi, Tərtər rayonunun Qazaxlar kəndi və Tərtər rayonunun Madaqiz kəndi istiqamətində yollar düşməndən azad olunmuşdur. 5 apreldə hər iki tərəfin razılığı və beynəlxalq qurumların müşahidəsi ilə yenidən atəşkəs müqaviləsi imzalanmışdır.