Erməni təəssübkeşliyi ikili standartlara çevriləndə

 Müstəqil xarici siyasət yürüdən, mürəkkəb beynəlxalq münasibətlər sistemində milli maraqlarını layiqincə qoruyan Azərbaycana qarşı bəzi dövlətlər və beynəlxalq qurumlar “təzyiq rıçaqları”nı yenidən işə salıblar. Azərbaycanın Cənubi Qafqazda faktiki güc mərkəzinə çevrilməsi ilə barışa bilməyən bu qüvvələr narahatlıqlarını müxtəlif formada nümayiş etdirirlər. Bu cərgədə yer alan yerli antimilli qüvvələr, özünü müxalifət adlandıran, əslində, uzun illər antiazərbaycan mövqeyində dayanan və ölkəmizə qarşı kampaniyalarda xüsusi canfəşanlıq göstərənlər daha da fəallaşıblar. Həmin qüvvələrin  simbiozu birləşərək  Azərbaycana qarşı çox çirkin, yalan və böhtan üzərində kampaniya aparırlar. Təəssüflər olsun ki, Azərbaycanı hədəf seçən bəzi beynəlxalq qurumlar və onların yedəkçiləri Ermənistanda baş verən antidemokratik hadisələri ya görməzdən gəlirlər və ya da ki, oradakı xaosu demokratiya “yolunda” atılan  addım kimi səciyyələndirirlər.

 Prezident İlham Əliyev ötən ilin yekunlarına həsr edilmiş iclasda diqqəti bu məsələyə çəkərək qeyd etdi ki, dünyada və bölgədə gedən mənfi proseslərə baxmayaraq, Azərbaycan hərtərəfli inkişaf edir. Ermənistanda iyirmi il ərzində kriminal, qaniçən xunta rejiminin hökm sürdüyünə diqqəti yönəldən dövlət başçısı bəzi beynəlxalq təşkilatların buna göz yumdugunu aydın şəkildə göstərdi. “İndi sual olunur, necə ola bilər ki, son illərdə Ermənistanda böyük miqyasda saxtakarlıqla keçirilmiş prezident və parlament seçkilərinə beynəlxalq təşkilatlar müsbət rəy verirlər. Axı, son parlament seçkiləri göstərdi ki, hakimiyyəti qanunsuz şəkildə zəbt etmiş dəstə 5 faiz də səs yığa bilməyib. Bunu hər kəs etiraf edir. Ancaq əvvəlki illərdə özlərinə 50 faizdən çox səs yazdıran kriminal rejimin fəaliyyəti niyə qınaq obyektinə çevrilməmişdir?! Avropa Şurası, Avropa Parlamenti və demokratiyadan, ədalətdən dəm vuran digər beynəlxalq təşkilatlar o biabırçı mənzərəyə niyə göz yumurdular?! Məgər onlar bilmirdilər ki, Ermənistanda bütün seçkilər saxtalaşdırılıb? Bilmirdilər ki, erməni xalqı kriminal rejimə nifrət edir? Çox yaxşı bilirdilər, amma göz yumurdular. Nəyə görə? İkili standartlara görə. Nəyə görə? Çox güman ki, burada hansısa təmənna ilə bağlı başqa məsələlər olub. Heç kimə sirr deyil ki, Ermənistan beynəlxalq arenada konyak diplomatiyasını işə salıb və bir çox siyasətçiləri satın alıb. Əvvəlki illərdə Ermənistanın xarici siyasətində rüşvət amili birinci yerdə idi”.

Son illərdə syasi riyakarlıgın, saxta iddialarla digər dövlətlərə təzyiq göstərmək cəhdlərinin aşkar müstəviyə keçməsi Avropada demokratik dəyərlərə ikili standart yanaşmanı tam təsdiq edir. Özlərini “demokratiya məbədi” sayan  Avropa dövlətləri istər insan hüquqlarına, istərsə də tarixi hadisələrə həqiqət və ədalət mövqeyindən deyil, sırf geosiyasi maraq prizmasından yanaşırlar. Təəssüf doğuran haldır ki, bu gün hansısa təəssübkeşliklə Ermənistanın beynəlxalq hüquq normalarını kobud şəkildə pozaraq işğalçılıq siyasəti yürütməsini etiraf etmək istəməyən bu demokratiya oyunçuları Azərbaycandakı xırda çatışmazlıqları süni şəkildə şişirdir, təcavüzkar dövlətin daxilində cərəyan edən antidemokratik proseslərə, antihumanist, zorakı addımlara isə göz yumurlar. Ermənistanda təkcə son bir neçə ildə baş verənləri xatırladaq.

 İrəvanda S.Sarkisyan rejimini süpürüb atan və total saxtakarlığa yol verən Nikol Paşinyanın kriminal dəstəsi saxta seçkilər keçirir, beynəlxalq qurumlar buna susur. Qatı cinayətkar qrupun liderləri, faşizm ideologiyasına açıq rəgbət göstərən və onu təblig edən şəxslər yüksək postlara gətirilir, beynəlxalq təşkilatlardan səs çıxmır. İrəvanın mərkəzində sabiq deputat Manvel Qriqoryanın azadlığa buraxılmasına etiraz olaraq neçə günlərdir ki, aksiya keçirilr, polislərlə etirazçılar arasında toqquşma baş verir Avropa Şurası, Avropa parlamenti elə bil ki, Ermənistan adlı məmləkətdən xəbərləri yoxdur. Sosial problemləri pik həddə olan, xarici dövlətlərin dilənçi payına möhtac olan Nikol Paşinyan hakimiyyəti rejimin əvvəlki liderləri - R.Koçaryan, S.Sarkisyan və digərlərinə qarşı amansız usullarla mübarizə aparır və xuntanın tərəfdarları arasında kriminal hadisələr yaşanır və  bu  Avropada eşidilmir. Hər bir xırda məsələni şişirdib dövlətlərə qarşı təzyiq vastəsi kimi hərəkətə keçirən Avropa Şurası, Avropa parlamentinin Ermənistana yönəlik hər hansı addım atmamasının bir adı var - ikili standart. Ermənistanda hakimiyyəti zorla zəbt etmiş kriminal xunta rejiminin süqutunda bu ölkənin işgalçılıq siyasəti də mühüm rol oynayıb.

 Qərbin demokratiya oyunçuları Ermənistanda  baş verənləri qulaq ardına vururlar. Azərbaycan torpaqlarının 20 faizindən çoxunun Ermənistan tərəfindən işğalını rəsmən etiraf edən BMT-nin Təhlükəsizlik Şurasının 4 qətnaməsi isə Avropada nədənsə "xatırlanmır".  Avropa Parlamenti  saxta «erməni soyqırımı»nı tanıdıqları halda, 1992-ci ilin fevralında dünyanın gözü qarşısında törədilmiş Xocalı soyqırımına göz yumurlar. Halbuki, ötən əsrin əvvəllərindən fərqli olaraq 90-cı illərdə azərbaycanlı əhalinin məhz milli-etnik zəmində ermənilərin soyqırımına məruz qalması konkret fakt və sənədlərdə təsdiqini tapır. “İkili standart”ların əsirinə çevrilənlər hadisələrə qərəzli kontekstdən siyasi qiymət verməyə çalışsalar da Azərbaycan bu cür primitiv təzyiq metodlarını qəbul etmir.

Son bir neçə həftədə Avropa İttifaqının bir sıra ölkəsində geniş vüsət alan “sari jiletli”lərin  tətilləridə hökumət qüvvələrinin aksiya iştirakçılarına qarşı ən amansız metodlardan istifadə etməsi demokratiya oyunçuları tərəfindən sükutla qarşılanır. Fransa, Böyük Britaniyada, Belçikada keçirilən irimiqyaslı aksiyalarda insanların dəyənəklərlə vəhşicəsinə döyülməsi, gözyaşardıcı qaz və s. vasitələrdən istifadə edilməsi, xüsusi təlim keçmiş itlərlə qovulması, atların ayaqları altına salınması dünyanın gözü qarşısında baş verir. Bu günlərdə Fransada sarı jiletlilərlə polis arsında baş vermiş toqquşmalarda 240 nəfər həbs edilib, 24 nəfər agır xəsarət alıb. Beynəlxalq qurumlardan hələ də reaksiyalar gəlmir....

Avropanın bəzi dövlətləri və beynəlxalq qurumlar demokratiyanı əldə bayraq edərək öz geosiyasi və iqtisadi maraqlarını təmin etməyə çalışırlar. Əksər hallarda isə "demokratiya", "insan hüquqları" kimi sivil dəyərlərə istinad edərək müəyyən dövlətlərə qarşı ikili standarlardan çıxış edirlər. Azərbaycana təsir və təzyiq göstərmək istiqamətində uğursuz cəhdlərin qarşısı isə həmişə alınıb və bundan sonra da qətiyyətlə alınacaq.