Dövlət Proqramları: nəticə və yeni gözləntilər
III Dövlət
Proqramı da ugurla icra olundu. Sual yaranır ötən müddətdə hər üç proqramın icrası nə kimi nəticələr
verib. 2014-2018-ci illərin iqtisadi təhlili deməyə əsas verir ki, dövlət proqramları
çərçivəsində görülən işlər nəticəsində regionlarda ən müasir infrastruktur
yaradılıb. Sahibkarlıq fəaliyyəti genişləndirilib, yeni müəssisə və iş yerləri
yaradılıb, əhalinin rifah halı yaxşılaşdırılıb. Regionların sosial-iqtisadi
inkişafı sahəsində həyata keçirilən siyasət ölkənin makroiqtisadi
göstəricilərinin yaxşılaşmasına səbəb olub.
Birinci
dövlət proqramının qəbul edilməsi Prezident İlham Əliyevin 2003-cü ildə
seçkiqabağı proqramımın bir hissəsi idi. O zaman dövlət başçısı bəyan etmişdi
ki, “əgər xalq etimad göstərərsə, regionların inkişafı mənim üçün əsas
vəzifələrdən biri olacaq”. 2004-cü ildə birinci dövlət proqramı qəbul edilən
zaman hələ ölkəyə böyük həcmdə neft gəlirləri gəlməmişdi. Ölkəmizə neft
gəlirləri Bakı-Tbilisi-Ceyhan neft kəmərinin 2006-cı ildə istismara
verilməsindən sonra gəlməyə başladı. Güclü iradə və düzgün seçilmiş ardıcıl
fəaliyyət Regional İnkişaf proqramlarının icrasına gətirib çıxardı və
bütövlükdə bütün digər sahələrdə də ardıcıl siyasət aparılaraq ölkəmiz daha da
gücləndirildi.
Regionların davamlı inkişaf etdirilməsi dövlətin
sosial-iqtisadi siyasətinin mühüm tərkib hissəsidir. Bu baxımdan regionlarında
mövcud infrastrukturun inkişafı və yenidən qurulması, məşğulluğun təmin
edilməsi, yeni zavod və müəssisələrin fəaliyyətə başlaması, kənd təsərrüfatına
göstərilən qayğı, sahibkarlıq fəaliyyətinə və fermerlərə dövlət tərəfindən
verilən dəstək, respublikada aparılan siyasi, iqtisadi və hüquqi islahatların
bariz nümunəsidir. Ardıcıl olaraq qəbul edilmiş normativ-hüquqi sənədlər,
sahibkarlığa dövlət maliyyə mexanizminin təkmilləşdirilməsi iş adamlarında
özünəinam hissini artırır, aqrar sahə üzrə sahibkarlıq fəaliyyətinin
genişləndirilməsinə, xüsusilə də regionlarda yeni sahibkarlıq subyektlərinin
fəaliyyətə başlamasına əsas verir.
Regional siyasətin həyata keçirilməsində hər
bölgənin özünəməxsus coğrafi şəraiti və əhalinin tarixən məşğul olduğu
sahələrin nəzərə alınması mühüm nəticələrə gətirib çıxarıb. Xarici
investisiyaların regionların inkişafına yönəldilməsi, əlverişli sahibkarlıq və münbit
biznes mühitinin təmin edilməsi Prezident İlham Əliyevin həyata keçiriyi
sosial-iqtisadi inkişaf strategiyasının ana xətti kimi diqqəti çəkir. Regionların sosial-iqtisadi inkişafı Dövlət
proqramlarının icrası bölgələrimizin simasını dəyişdirib.
2014-cü il 27
fevral tarixli sərəncamı ilə təsdiq edilən «Azərbaycan Respublikası
regionlarının 2014-2018-ci illərdə sosial-iqtisadi inkişafı Dövlət Proqramı» da
2004 və 2009-cu illərdə qəbul edilən dövlət proqramlarının davamı oldu. III Dövlət Proqramının ugurla icrası təsdiq
etdi ki, qeyri-neft sektorunun inkişafı sahəsində 2004-cü ildən
başlanmış tədbirlər uğurlu davam etdirilib. Regionlarda infrastrukturun
yeniləşdirilməsi insanların firavan və rahat yaşayışı, sahibkarlığın
dinamik inkişafı məsələləri ilə yanaşı, bu gün həm də ölkənin milli
təhlükəsizliyi ilə bağlı məsələdir. Həyata keçirilən şaxələndirmə tədbirləri,
sahibkarlığın inkişafı, investisiya mühitinin daha da yaxşılaşdırılması
nəticəsində qeyri-neft sektoru davamlı inkişaf edib. Mürəkkəb xarici iqtisadi mühit, o cümlədən dünya enerji bazarında
qeyri-sabitlik, milli valyutaların devalvasiyasına baxmayaraq qeyri-neft
sektorunuda artımın əldə olunması təqdirəlayiq haldır. Bütün bu çətinliklərə
baxmayaraq ölkə rəhbərliyi tərəfindən vaxtında qəbul edilən müdrik qərarlar
sayəsində Azərbaycan böhran
vəziyyətindən ən az itkilərlə çıxan ölkədir.
Regionların sosial-iqtisadi inkişafı Dövlət
Proqramlarının uğurla həyata keçirilməsi Azərbaycanın qeyri-neft sektorunda mühüm
nəticələrin əldə olunmasına gətirib çıxarıb. Regionların inkişafına xidmət edən
kompleks tədbirlərin davamlı səciyyə daşıması tamamilə təbiidir: inkişaf etmiş
dövlətlərin təcrübəsi də sübut edir ki,
iqtisadiyyatın sabit tempini qorumaq üçün regional inkişafda tarazlılığın, tarixi
məşğulluq ənənələrinin saxlanılması vacib şərtlərdəndir.
Dövlət
proqramlarının icra olunduğu 2004–2018-ci illər ərzində ümumi daxili məhsul 3,3
dəfə, o cümlədən qeyri-neft sektoru üzrə 2,8 dəfə, sənaye üzrə 2,6 dəfə, kənd
təsərrüfatı üzrə 1,7 dəfə artıb. Bu müddətdə həyata keçirilmiş məqsədyönlü
tədbirlər nəticəsində ölkədə 1,5 milyonu daimi olmaqla 2 milyondan çox yeni iş
yeri, 100 mindən çox müəssisə yaradılıb, işsizlik 5 faizə, yoxsulluq səviyyəsi
isə 5,1 faizə enib. Aparılan uğurlu siyasət ölkəmizə böyük
həcmdə vəsaitin, sərmayənin yatırılmasına gətirib çıxarıb. 15 il ərzində
Azərbaycana təxminən 250 milyard dollar sərmayə qoyulub ki, bu sərmayənin
yarısı xarici investisiyadır.
Prezident İlham Əliyev regional inkişaf
sahəsində davamlılıgı təmin etmək məqsədilə “Azərbaycan Respublikası
regionlarının 2019–2023-cü illərdə sosial-iqtisadi inkişafı Dövlət Proqramı”nın
təsdiq edilməsi haqqında Fərman imzaladı. Bu fərman ölkə regionlarının, o
cümlədən kənd yerlərinin sosial-iqtisadi inkişafı sahəsində görülmüş işləri
növbəti illərdə də davam etdirmək, eləcə də infrastrukturun və sosial
xidmətlərin daha da yaxşılaşdırırmaq məqsədi daşıyır. Prezident
İlham Əliyev III Dövlət Proqramının icrasının yekunlarına həsr olunmuş
konfransda bildirib: “İlkin hesablamalara görə, regionların sosial-iqtisadi
inkişafına dair dördüncü Dövlət Proqramının icrası üçün ən azı 17 milyard
manatdan çox vəsait nəzərdə tutulur. Hesablanıb ki, bunun 4,6 milyard manatı
özəl sektor tərəfindən indi icra edilən və hazırlığı gedən layihələrə
investisiya şəklində qoyulacaq. Dövlət tərəfindən təxminən 13 milyard manata
yaxın kapital qoyuluşu gözlənilir. Ancaq əlbəttə ki, bu, ilkin rəqəmdir. Mən
tam əminəm ki, bu rəqəm daha böyük olacaq. Çünki əvvəlki üç proqramın icrası
bunu göstərir. Çünki üç proqramın hər biri artıqlaması ilə icra edilmişdir.
Əminəm ki, dördüncü proqram da artıqlaması ilə icra ediləcək”.
Növbəti beşilliyin əsas hədəf milli iqtisadiyyatın rəqabət qabiliyyətliliyinin
yüksəldilməsinə və dünya təsərrüfat sisteminə səmərəli inteqrasiyasına nail olmaqla,
ölkədə dinamik sosial-iqtisadi inkişafın davamlılığını təmin etməkdən ibarətdir.
Prezident İlham Əliyev imzaladığı fərmanlarda, təsdiq etdiyi dövlət proqramlarında
bu hədəflərin reallaşdırılması üçün yerinə yetirilməsi zəruri olan vəzifələr dəqiqliklə
müəyyənləşdirilmişdir. IV Dövlət Proqramında müəyyən edilmiş məqsədlərə nail olmaq
üçün növbəti beş il müddətində ölkənin təbii
və əmək potensialından səmərəli istifadə etməklə qeyri-neft sektorunun sürətli
inkişafının təmin edilməsi; infrastruktur təminatının yaxşılaşdırılması istiqamətində
tədbirlərin davam etdirilməsi; sahibkarlıq mühitinin yaxşılaşdırılması ilə bağlı
məqsədyönlü tədbirlərin həyata keçirilməsi və sahibkarlığın inkişafının daha da
sürətləndirilməsi; ixracyönümlü məhsul istehsalının stimullaşdırılması; müasir
tipli infrastruktur obyektlərinin yaradılması, əhalinin məşğulluq səviyyəsinin artırılması
istiqamətində tədbirlərin davam etdirilməsi və digər zəruri tədbirlər nəzərdə
tutulur.
Dövlət başçısı növbəti beş ildə hər bir sahə üzrə görüləcək işlərlə
baglı da konkret göstərişlər də verdi. Bakı, Abşeron və
digər bölgələr üçün ənənəvi olan sahələrin – zeytunçuluq, üzümçülük,
baramaçılıq, tütünçülük, bagçılıq və digər sahələrdə məhsuldarlıgın artırılması
və məhsulların böyük həcmdə xarici
bazarlara çıxarılmasının vacibliyini vurguladı. Bu sahələrin inkişaf
etdirilməsi üçün aidiyyatı qurumlara tapşırıqlar verdi.
III Dövlət Proqramının uğurla həyata
keçirilməsi qeyri-neft sektorunun inkişafına və ixrac imkanlarının
genişlənməsinə gətirib çıxarıb. Bölgələrin inkişafına xidmət edən kompleks
tədbirlərin davamı kimi növbəti beşillik proqramın da təsdiq edilməsi ölkə
rəhbərinin yürütdüyü iqtisadi strategiyanın məqsədyönlülüyündən xəbər verir.
Комментарии
Отправить комментарий